餐廳快速搜尋
漁屋日本料理 
漁屋日本料理
地址 荃灣楊屋道18號荃新天地2期UG層09-11號舖
電話 2481-2688
菜式 日本 日式餐廳 壽司魚生
人均消費 HKD101-200


7.1
味道 3.8
服務 3.6
環境 2.8
價錢 4
3
0
1
付款方法 現金及信用卡、設加一
泊車資料 荃新天地停車場
相關食訊
鍋物Tour (飲食短打 / 20/05/2010)
[詳情]
相關食評
  • 沙律、小食、手卷
    沙律、小食、手卷
  • 卷物、火焰壽司
    卷物、火焰壽司
  • 壽司
    壽司
  • 刺身
    刺身
  • 一品料理
    一品料理
  • 炸物
    炸物
  • 爐端燒
    爐端燒
  • 甜品
    甜品
  • 飲品
    飲品
  • 環境,好爆場!
    環境,好爆場!

生日正日同老婆食咗一餐生日飯,隔多個星期又再一齊食多餐生日飯,但人腳就多啲,加埋姨仔、舅仔同佢女友,佢幾個又話想幫我慶祝下喎。查實年紀大咗,對生日飯都唔喺好在意,其實都志在搵個藉口一齊高興吓食番餐啫,要我搵地點,我都落意嘅,只喺要就得到各人口味,有啲煩啫,結果就去食日式放題,貪佢選擇多,點多少都得。選址荃灣如心廣場嘅漁屋,一來見佢幾人氣,二來價位唔貴,再者就喺近西鐵站,方便我哋往返。

10張唔同長短、顏色嘅點菜紙,就包括晒所有任食任飲嘅選擇,有沙律、小食、手卷、卷物、火焰壽司、壽司、一品料理、炸物、爐端燒、拉麵 / 烏冬 / 炒飯、刺身、飲品、甜品,數過一次,嘢食連嘢飲,一共有成150樣嘢,一定令你飽住走。有咩揀我就唔多講,因為小弟將佢啲點菜紙掃描晒,放晌個食評度,大家可以慢慢參詳!

一早訂好星期日7:30pm,侍應晌電話都交帶一句,話星期日通常都滿座,雖然訂咗位,最好都預早少少到,我哋都怕人多入座難控制,所以預早7:15pm到,嗰度勝在流量快,最後7:30pm都準時交到枱俾我哋。因任食任飲限時兩個鐘,所以「嗱嗱淋」點嘢先,我哋兵分三路,分別各點幾個類別,一來減少重複,二來咁樣有效率啲。當晚,我就見過隔離枱嗰一家人,因為一大棚人,點嘢無分工,結果就有好多嘢食重複又重複,而且點突晒,食剩唔少,感覺頗為浪費!

成晚嚟講,個個類別都點啲,我哋5個人食咗乜,以下數一數先:
沙律、小食、手卷:
蟹籽沙律、三文魚蟹籽沙律 – 餐前兩款沙律,志在清清味蕾。前者包含白蘿蔔絲、青瓜絲、蟹柳絲及蟹籽,唧上一般沙律,比較大路製作;後者材料都喺啲沙律菜、粟米、蟹柳粒、蛋粒、蕃茄、三文魚、蟹籽,但用上柚子醋汁,較為清爽輕怡啲。
芝麻八爪魚、川風螺肉、中華沙律 – 一小兜上晒3樣嘢,仲晌上面加咗少少素魚翅及芝麻,賣相俾咗啲手機。其實有少少怕八爪魚、螺肉「一坺坺」(音:pat)嘅醬,雖然啲嘢味道OK,但唔咁一坺嘢好啲。
軟殼蟹天婦羅手卷、大蝦天婦羅手卷 – 無諗過點手卷,因為喺太飽肚嘢喇,點咗完全喺意外。其實喺想點天婦羅,大意一時睇錯,變咗手卷,仲要好多客添,做人嘅嘢,錯就要認,小弟只好一個人頂多幾件,唉!如果唔喺小弟依個錯誤,可以試多好多嘢囉。
 

卷物、火焰壽司:
花之戀人、櫻之戀人、雪之戀人 – 3款卷物都唔錯喎,後兩位「戀人」值得推介,尤其個「櫻之戀人」,立方粒形嘅「壽司」,賣相精緻,以為上面一粒甜蝦下面喺一舊飯,原來飯內中空有舊炸蝦,口感過癮呀!所以跟住就一次過再多點5客,因為真喺好食,值得「安哥」。
火焰芝士熟蝦壽司、火焰鰈魚背壽司 - 火焰壽司一共有7款,點咗其中兩款試試,味道不俗,尤其鰈魚背,話喺獨家必試,賣相小巧,鰈魚背又幾油潤鮮美。

壽司
壽司類一欄就供應常見嘅壽司同軍艦,都有成19款,但見唔喺太特別,只喺點少少嚟應吓景。點咗吞拿魚壽司、帶子壽司、八爪魚鬚壽司、栗米沙律軍艦,以帶子壽司最有睇頭,帶子厚肉味道挺鮮甜,壽司飯不過不失。

刺身:
志在食得開心,唔喺為翻本,所以就算刺身,亦無亂咁狂點,但都點咗其中9款一試,樣樣都喺數量幾件,等大家都有機會試吓。一小碟冰鎮住上枱,雖然外觀唔喺執得好靚,但睇落啲刺身質素唔錯。9款刺身分別有三文魚、甜蝦、帶子、玻璃蝦、墨魚、蟹柳、紅立魚、鮑魚片、吞拿魚,小弟覺得三文魚、帶子、玻璃蝦依幾款較好,但整體大家都覺得水準屬中上!

一品料理:
因為查實舅仔對生嘢唔多啱口味,所以屬於熟嘢嘅一品料理就為佢而點多啲。17款嘢,都幾多選擇,我哋前前後後都叫咗成7樣:地獄餃子鍋、清酒煮蜆、牛油栗米、燒羊架、金菇牛肉卷、糖心溫泉蛋、麵豉湯。依個部份出乎意料之好喎,必試之選有燒羊架、糖心溫泉蛋、麵豉湯,羊架大大件燒得金香,溫泉蛋極之糖心,蛋黃濃香,麵豉湯撈一撈有昆布、豆腐粒、蜆隻,味噌味濃郁,有誇意之作。另外兩款推介之選:地獄餃子鍋唔算好地獄,中辣啦,勝在材料多,一鍋過有好多嘢食,餃子亦煎得香脆;清酒煮蜆,蜆肉幾鮮甜,只喺清酒味未夠強啫。

炸物:
之前睇錯天婦羅一欄,事後搵番啱,當然唔會錯過啦,天婦羅香口嘢又個個啱食,自不然會點多少少,不過我哋都喺為免浪費,唔會點人頭數,寧願樣樣要幾件,可以多試幾款。新鮮熱辣送上,一籃子有大蝦天婦羅、南瓜天婦羅、蕃薯天婦羅、青椒天婦羅、茄子天婦羅、松葉蟹捧天婦羅、吉列墨魚餅、關東魚餅、炸餃子、芝士年糕,喺咪引到流口水呢?大部份都炸得唔差,脆漿無過厚,鬆脆唔油,而咁多款嘢,最得小弟歡心喺大蝦、南瓜、蕃薯、吉列墨魚餅、芝士年糕,除咗本身鍾意食依幾樣嘢之外,佢哋本身原味個味道較突出。

爐端燒:
輪到爐端燒,因為喺熟食關係,我哋一樣叫唔少,同樣叫得嚟款多量少,鹽燒秋刀魚、鹽燒多春魚、免治軟骨雞肉捧、鹽燒鯖花魚、鹽燒雞中翼、燒日本河豚魚乾。當中免治軟骨雞肉捧同雞中翼有驚喜喎,前者口感軟滑香脆,後者雞中翼用上大呎吋嘅,唔會無肉食,況且醃得入味燒得甘香。燒日本河豚魚乾亦喺另一道心水菜,佐酒一流,魚乾已剪成一條條,口感軟軟,咬落又帶點煙韌。不過,成晚前後落過幾次單嘅漁屋長串燒(海蝦、青椒、芝心丸、車厘茄、帆立貝),一串都無嚟唔到,至於其他嘢都有漏少少單,但情況唔嚴重,以今晚爆晒場嚟計,實屬輕微啦!

拉麵 / 烏冬 / 炒飯:
如有需要,打算最後墊肚先叫,不過你見上面食咗咁多嘢,都無需要啦!況且女士們中後段已話差唔多,所以,留肚食雪糕仲好啦。

甜品:
甜品分3類,仲晌門口剎有介事貼咗張通告:最新好消息,凡惠顧放題,豆腐花、啫喱、雪糕任食,大抵以前應該無甜品吧!不過最搞笑佢張點菜紙嘅標題竟然用上「特式甜品」喎,小弟就睇唔到有幾特色喇,哈哈!3類甜品喺迷你豆腐花、四方啫喱、雪糕棉花杯,豆腐花品牌喺百福,但有別一般超市版本,喺份量少一半嘅迷你裝,但質感依然超滑,只有原味;啫喱無試,亦都唔多見有人試,相信喺四方果啩;而雪糕喺雀巢,雖然唔喺咩貴價品牌,但對雀巢棉花杯都有份懷念,本土嘢梗喺要支持吓啦,所以小弟4款味(雲呢拿、紅豆、朱古力、芒果)都各叫一客以表支持,紅豆味較少食到,朱古力味似乎最好食。

飲品:
又串燒、又天婦羅,嘢飲唔少得,漁屋任飲選擇確實唔少,6款原罐罐裝汽水,仲有冷熱清酒、啤酒、冷熱玄米綠茶。我哋唔喺好酒一族,都點咗一小枝熱清酒高興吓,酒精度雖高,但小杯小杯咁飲,都OK架;我就盡興啲零系可口可樂接芬達提子汁,一罐接一罐,到最後大家都叫杯熱玄米綠茶嚟暖番吓啲腸胃!

今回初次幫襯漁屋,感覺良好,除咗食物選擇多,我哋大部份點嘅嘢食都有一定水準,依時交枱俾我哋之餘,差不多夠鐘時又無話刻意催我哋走。咁爆場嘅情況下,漏單亦好輕微,而且無話貴價嘢點極都無,仲有服務員幾勤快,上菜收碟「渣渣淋」,態度唔錯,有個女經理臨截單前仲專燈走嚟問我哋仲有無嘢要點,我哋都食到好飽喇,但至少佢都有咁嘅心提提啲客。晌度借機再次多謝姨仔、舅仔佢哋幾個,等我食得滿載而歸!



推介菜式 櫻之戀人, 雪之戀人, 燒羊架, 糖心溫泉蛋, 麵豉湯, 芝士年糕, 免治軟骨雞肉捧, 燒日本河豚魚乾
時段 晚餐
慶祝紀念 生日
用餐埸合 家庭聚會 , 三五知己
是次消費 HKD$ 207
食家評分
味道
服務
環境
價錢
地圖
  附近街景
U Know| U Travel| U Beauty| U Magazine